BAKDO IKI PANCEN SEJE

Pasane wus paripurna, riyaya katon menjela

Ananging kahanan isih tetep padha

Ora ana swara terompet kang saut-sautan

Ora ana urupe oncor kang madhangi laladan

Bakdo iki pancen seje 

Masjid sepi tan ana piyayi kang nyaba

Ora ana takbir kang ngumandhang nganggo adhah kandha

Apa maneh tetabuhan maneka warna

Bakdo iki pancen seje 

Kabeh padha sholat idul fitri dhewe-dhewe

Ana ing ndalem karo keluargane

Ora kena kumpul rame-rame

Bakdo iki pancen seje

Ora ana kang bisa ujung

Sowan marang bapa lan biyung

Saperlu nyuwun pangapura kang agung

Bakdo iki pancen seje

Ora katon guyune bocah cilik kang sumringah

Bungah atine amarga nampa pitrah

Saka para sedulur lan para simbah

Bakdo iki pancen seje

Kabeh mau amarga kahanan wigati

Anane pegeblug covid-19 kang nggegirisi

Kabeh warga pancen kudu ngati-ati

Bakdo iki pancen seje

Ayo padha nyenyuwun mring Kang Kuasa

Muga-muga wabah iki enggal sirna

Supaya kahanan becik enggal bisa tumata

Sukoharjo, 25 Mei 2020